Kənd təsərrüfatı büdcəsinin 38%-i ərzaq təhlükəsizliyinə ayrılır

Gələn il dövlət büdcəsindən kənd təsərrüfatına ayrılacaq vəsaitin təxminən 38%-i, yəni 522.6 milyon manatı ərzaq təhlükəsizliyinə yönəldiləcək. Bu göstərici 2027-ci ilin büdcə zərfinin layihəsində əksini tapıb və 2026-cı ilin səviyyəsindən təxminən 2% çoxdur.

Həmin vəsait fermerlərə bir neçə istiqamətdə dəstək verilməsinə sərf olunacaq. Əkin subsidiyası bitki becərilən sahənin hər hektarına görə xərclərin bir hissəsini kompensasiya edəcək. Dincə qoyulmuş torpaq üzrə ödəniş isə müraciət edilmiş torpaqların münbitliyinin bərpası və alaq otlarının azaldılması məqsədilə bir il müddətinə dincə qoyulan sahənin hər hektarına veriləcək.

Bağçılıq subsidiyası bağın salındığı birinci ildə fermerlərin kənd təsərrüfatı istehsal vasitələrinin alınmasına çəkdiyi xərclərin bir hissəsini ödəyəcək. Bitkiçilik sahəsində məhsul subsidiyası ölkədə istehsal edilib tədarükçülərə təhvil verilən məhsulun miqdarına görə hesablanacaq. Toxum subsidiyası isə sortluq və səpin keyfiyyətləri təsdiq olunmuş toxumun və tingin satışına görə veriləcək.

Heyvandarlıq üzrə də ödənişlər nəzərdə tutulub. Süni mayalanma və ya embrion köçürmə subsidiyası yerli heyvanın cins tərkibinin yaxşılaşdırılması və yüksək məhsuldar genetik potensialı olan heyvanların baş sayının artırılması məqsədilə alınan hər sağlam buzova və balağa görə veriləcək. Heyvan subsidiyası kənd təsərrüfatı heyvanlarının saxlanılması, yemlənməsi və damazlıq işinin təşkili xərclərinin bir hissəsini hər heyvana, o cümlədən ana ailesinə görə kompensasiya edəcək.

Bundan başqa, heyvandarlıq sahəsində məhsul subsidiyası tədarükçülərə təhvil verilən heyvan mənşəli məhsul və ya xammalın miqdarına görə ödəniləcək. Sertifikatlaşdırma subsidiyası bitkiçilik və heyvandarlıq sahələrində beynəlxalq sertifikatların alınması, təsərrüfatların müəyyən olunmuş tələblərə uyğunlaşdırılması xərclərinin bir hissəsini əhatə edəcək.

Vəsait həmçinin sahibkarlıq subyektlərinə bir il müddətinə qədər verilən kreditlərin faizlərinin maliyyələşdirilməsinə, lizinqə verilən və lizinq yolu ilə istehsalçılara dövlət büdcəsinin vəsaiti hesabına verilən güzəştlərə və kənd təsərrüfatı sahəsində digər tədbirlərə yönəldiləcək.