Hesablama Palatası 2027-ci il büdcə layihələrinə rəylərini Milli Məclisə göndərir

Hesablama Palatası 2027-ci il dövlət büdcəsinin və Dövlət Sosial Müdafiə Fondunun büdcə layihələrinə dair rəylərini təsdiqləyib. Qurumun sədri Vüqar Gülməmmədovun rəhbərliyi ilə keçirilən Kollegiya iclasında bu sənədlərin Milli Məclisə təqdim olunması barədə qərar qəbul edilib.

Hesablama Palatasının məlumatına görə, iclasda əvvəlcə 2027-ci il dövlət büdcəsinin layihəsinə dair Rəy müzakirə olunub. Sənəd dövlət büdcəsi haqqında qanun layihəsinin və onunla birlikdə verilən aidiyyəti sənədlərin qüvvədə olan qanunvericiliyə uyğunluğunun qiymətləndirilməsini əhatə edir.

Rəydə dövlət büdcəsinin gəlir və xərc proqnozlarının, həmçinin büdcə kəsirinin nəzərdə tutulan göstəricilərinin düzgünlüyü və tamlığı təhlil edilib. Kollegiya iclasında sənəddə əksini tapan əsas nəticələr və tövsiyələr müzakirə olunub, müvafiq məsələlər üzrə fikir mübadiləsi aparılıb.

Sonra Dövlət Sosial Müdafiə Fondunun 2027-ci il üçün büdcə layihəsinə dair Rəy müzakirəyə çıxarılıb. Bu sənəd üzrə aparılmış təhlillərin nəticələri və irəli sürülmüş tövsiyələr Kollegiya üzvlərinə təqdim olunub. Yekunda DSMF-nin büdcə layihəsinə dair Rəyin də təsdiqlənməsi və Milli Məclisə göndərilməsi barədə qərar qəbul edilib.