Deputat region fermerlərinin elektron ticarətə çıxışını genişləndirməyi təklif edib

Milli Məclisin bu gün keçirilən plenar iclasında deputat Müşfiq Məmmədli regionlarda çalışan kiçik və orta sahibkarların, fermerlərin və yerli istehsalçıların elektron ticarət platformalarına çıxışının genişləndirilməsini təklif edib. Onun sözlərinə görə, hazırda bu imkanlardan əsasən Bakı, Gəncə və Sumqayıt kimi iri şəhərlər istifadə edir.

Deputat qeyd edib ki, regionlardakı kiçik sahibkarlar, fermerlər, ailə təsərrüfatları və yerli istehsalçılar da rəqəmsal platformalar vasitəsilə yeni bazarlara çıxa bilər. O, Qubada meyvəçiliklə məşğul olan fermerləri, Cəbrayılda kənd təsərrüfatı məhsulları istehsal edən sahibkarları və Xırdalanda kiçik ailə biznesi quran şəxsləri nümunə göstərib. Müşfiq Məmmədli müvafiq icra hakimiyyəti orqanlarına bu inteqrasiyanı stimullaşdıran tədbirləri nəzərdən keçirməyi təklif edib.

Deputat elektron ticarətin artıq yalnız internet üzərindən alış-veriş olmadığını vurğulayıb. Onun fikrincə, bu sahə iqtisadiyyatın rəqəmsallaşması, nağdsız ödənişlərin genişlənməsi, şəffaflığın artırılması və yeni sahibkarlıq imkanları baxımından mühüm əhəmiyyət daşıyır. Texnologiyaların sürətlə inkişaf etdiyi şəraitdə qanunvericiliyin də bu prosesə uyğunlaşdırılmalı olduğunu bildirib.

O, elektron ticarətin genişlənməsi ilə yanaşı saxta internet mağazaları, keyfiyyətsiz məhsulların satışı, ödənişdən sonra malların çatdırılmaması və şəxsi məlumatlardan qanunsuz istifadə kimi risklərin də artdığını deyib. Bu baxımdan deputat platformalarda aşağıdakı mexanizmlərin təkmilləşdirilməsini təklif edib:

• Satıcıların identifikasiyası;
• Məhsullar haqqında məlumatların şəffaflığının təmin edilməsi;
• Malların geri qaytarılması prosedurlarının təkmilləşdirilməsi;
• İstehlakçı şikayətlərinə operativ baxılması.

Müşfiq Məmmədli nağdsız ödənişlərin genişlənməsinin kiberdələduzluq risklərini də aktuallaşdırdığını bildirib. Deputatın fikrincə, elektron ödənişlər zamanı fərdi məlumatların qorunması, istifadəçilərin təhlükəsiz identifikasiyası və şübhəli əməliyyatlara qarşı çevik müdafiə mexanizmləri xüsusi əhəmiyyət daşıyır.