“A-Qrup Sığorta”nın 9 aylıq mənfəəti 23.4% azalıb

“A-Qrup Sığorta” ASC bu ilin yanvar-sentyabr aylarında 1,269 milyon manat mənfəət əldə edib. Şirkətin maliyyə hesabatına görə, bu göstərici ötən ilin eyni dövrü ilə müqayisədə 23.4% azdır.

Doqquz ay ərzində şirkətin gəlirləri 16,802 milyon manat olub ki, bu da bir il əvvəlkindən 4.4% çoxdur. Xərclər isə 15,533 milyon manata çatıb və illik müqayisədə 7.6% artıb. Hesabat dövründə şirkət mənfəət vergisi ödəməyib.

Oktyabrın 1-nə “A-Qrup Sığorta”nın aktivləri 25.58 milyon manat təşkil edib, bu da illik müqayisədə 0.7% çoxdur. Öhdəliklər 4.9% artaraq 10,782 milyon manata çatıb, balans kapitalı isə 2.2% azalaraq 14,798 milyon manata düşüb.

Şirkət 1995-ci ildə yaradılıb, nizamnamə kapitalı 10,005 milyon manatdır. Əsasən tibbi sığorta üzrə ixtisaslaşan “A-Qrup Sığorta”nın səhmləri 100% Sabir Adna oğlu Adnayevə (Direktorlar Şurasının sədri) məxsusdur.