Musa Quliyev: orta pensiya gələn il 640 manata çatacaq

Azərbaycanda orta aylıq pensiya cari ildə 595 manat, gələn il isə 640 manat olacaq. Bu barədə Milli Məclisin Əmək və sosial siyasət komitəsinin sədri Musa Quliyev deyib. O, bunu İqtisadi siyasət, sənaye və sahibkarlıq komitəsi ilə birgə iclasda – «Dövlət sosial müdafiə fondunun 2027-ci il büdcəsi haqqında» qanun layihəsinin müzakirəsi zamanı dilə gətirib.

Komitə sədrinin sözlərinə görə, əvvəlki illərdə olduğu kimi cari və növbəti ildə də orta aylıq pensiya orta aylıq əmək haqqının 50%-dən az olmayacaq. Bu da pensiyaların Beynəlxalq Əmək Təşkilatının sosial təminatın 40%-lik minimum norması haqqında konvensiyasına uyğun gəlməsi deməkdir.

Musa Quliyev əlavə edib ki, 2019-cu ildən başlayaraq ölkə üzrə pensiyaçılar üçün əmək pensiyalarının minimum məbləği yaşayış minimumunu üstələyib. Həmin meyar gələn ildə də qüvvədə olacaq.