Köhnə əmlak sənədləri üzrə çıxarışlar rüsumsuz verilə bilər

2006-cı il iyulun 6-dək verilmiş əmlak sənədləri əsasında daşınmaz əmlaka çıxarış və texniki pasport dövlət rüsumu tutulmadan təqdim edilə bilər. Bununla bağlı «Daşınmaz əmlakın dövlət reyestri haqqında» qanuna dəyişiklik təklif edilir.

Təklifə görə, həmin tarixə qədər daşınmaz əmlak üzərində hüquqları təsdiq edən aktlar, şəhadətnamələr və qeydiyyat vəsiqələri əsasında bu hüquqların dövlət reyestrində qeydiyyata alınması barədə çıxarış rüsumsuz veriləcək. Eyni qayda daşınmaz əmlaka dair texniki sənədlərə — pasport və plan-ölçüyə də şamil olunacaq.

Dəyişiklik daha iki halı əhatə edir. Hüquq sahibinin iradəsindən asılı olmayan səbəblərdən obyektin ünvanı dəyişdikdə, prospekt, küçə, meydan və digər ərazi vahidlərinin tərkib hissələrinə ad verildikdə və ya adları dəyişdirildikdə çıxarış və texniki sənədlər rüsumdan azad olunacaq. Qeydiyyat orqanının yol verdiyi texniki səhvlər aradan qaldırıldıqda da ödəniş tələb edilməyəcək.

Qüvvədə olan qanunvericiliyə əsasən, daşınmaz əmlak üzərində hüquqların dövlət reyestrində qeydiyyata alınmasından əvvəl verilmiş hüquqmüəyyənedici sənədlər əsasında çıxarışın və texniki sənədlərin təqdim edilməsi, habelə ünvan dəyişikliyi və qeydiyyat orqanının texniki səhvlərinin aradan qaldırılması ilə bağlı hallarda dövlət rüsumu tutulmurdu.