İSF-nin 2027-ci il büdcə layihəsi: gəlirin 99.4%-i sığorta haqlarından gələcək

Əmək və Əhalinin Sosial Müdafiəsi Nazirliyi yanında İşsizlikdən Sığorta Fondunun 2027-ci ildə gözlənilən gəliri 268.9 milyon manatdır. «İşsizlikdən Sığorta Fondunun 2027-ci il büdcəsi haqqında» qanun layihəsinə görə, bunun 267.2 milyon manatı, yəni 99.4%-i işsizlikdən sığorta haqlarının hesabına formalaşacaq.

Sığorta haqlarının 29.8 milyon manatı büdcədən maliyyələşən təşkilatlar üzrə, yenə 29.8 milyon manatı büdcədən maliyyələşən təşkilatlarda işləyənlər üzrə, 207.6 milyon manatı isə qeyri-büdcə sektoru üzrə toplanmalıdır. Fondun sair gəlirləri 1.7 milyon manat olacaq.

Gələn il Fondun xərcləri 319.2 milyon manat təşkil etməlidir. Bu məbləğin hesablanmasında cari ilin sonuna istifadə olunmamış 50.3 milyon manat qalığından da istifadə nəzərdə tutulur.

Xərclərin ən böyük hissəsi özünüməşğulluq tədbirlərinin təşkili ilə bağlıdır — 113 milyon manat. Fondun aparatının, onun idarə, filial və nümayəndəliklərinin, habelə tabeliyindəki digər qurumların saxlanılmasına 75 milyon manat ayrılacaq.

• Əhaliyə sosial sahədə xidmətlərin təşkili üzrə fəaliyyətin müştərək maliyyələşdirilməsi — 50 milyon manat
• İşsizliyə görə sığorta ödənişi — 36 milyon manat
• Peşə hazırlığı və əlavə təhsilin təşkili — 27.3 milyon manat
• Sosial iş yerlərində işçilərin əmək haqlarının bir hissəsinin maliyyələşdirilməsi — 7 milyon manat

Qalan xərclər sırasında haqqı ödənilən ictimai işlərin təşkili (3.8 milyon manat), sosial müəssisələrin yaradılması və məqsədli proqramlar (2 milyon manat), peşəyönümünə dair məsləhət xidmətləri (1.6 milyon manat) var. Peşə standartlarının hazırlanmasına, sosial müdafiəyə xüsusi ehtiyacı olan və işə düzəlməkdə çətinlik çəkən şəxslər üçün kvotadan əlavə iş yerlərinin yaradılmasına, digər aktiv məşğulluq tədbirlərinə hərəyə 1 milyon manat, əmək yarmarkalarının və əmək birjalarının təşklinə 0.5 milyon manat ayrılır.