Fermerlərə vergi üzrə 90 faiz güzəşt EKTİS-də qeydiyyat şərti ilə nəzərdə tutulur

Azərbaycanda aqrar sahədə çalışan fermerlər və sahibkarlar üçün vergi üzrə 90 faiz güzəştin tətbiqi nəzərdə tutulur. Kənd təsərrüfatı naziri Məcnun Məmmədov bunu Birinci Azərbaycan Regional Akvakultura Forumu çərçivəsində jurnalistlərə deyib. Onun sözlərinə görə, söhbət vergilərin tamamilə ləğvindən getmir.

Güzəştdən yararlanmaq üçün fermer təsərrüfatları və aqrar sahədə fəaliyyət göstərən sahibkarlar Elektron Kənd Təsərrüfatı İnformasiya Sistemində (EKTİS) qeydiyyatdan keçməlidir. Nazir bildirib ki, əsas məqsəd bütün fermer təsərrüfatlarının, həmçinin təkcə ilkin məhsul istehsalı ilə deyil, ilkin emalla da məşğul olan təsərrüfat subyektlərinin EKTİS-də qeydiyyatdan keçməsini, məhsullarını bəyan etməsini və dolğun məlumatların təqdim olunmasını təmin etməkdir.

Nazir toxum nəzarətindən də danışıb. Onun sözlərinə görə, toxum standartlarına cavab verməyən məhsullar toxum kimi tanınmır və Aqrar Xidmətlər Agentliyinin nəzdində fəaliyyət göstərən Toxum Nəzarəti qurumu tərəfindən çıxdaş edilir. Statistikada toxum istehsalının azalması görünsə də, bu, ümumi azalma deyil, keyfiyyətli toxumun real həcmini əks etdirir. Son üç ildə tətbiq edilən nəzarət tədbirləri nəticəsində real toxumçu fermerlər müəyyənləşdirilib.

Ötən il 10 hektardan və 100 hektardan çox sahədə taxıl əkən fermerlər üçün, bu ilin payızlıq əkinlərindən etibarən isə 5 hektardan çox sahədə taxıl əkən fermerlər üçün sertifikatlı toxumdan istifadə tələbi müəyyənləşdirilib. Nazir deyib ki, bunun əsas məqsədi ölkə üzrə ümumi məhsuldarlığın artırılmasıdır. Onun sözlərinə görə, hər il ölkədə 800 min – 1 milyon hektar ərazidə taxıl əkilir və bu proses təxminən 250-350 min fermeri əhatə edir.