Elektron ticarət qanununda ərazi məhdudiyyəti götürülür

Milli Məclisin bugünkü iclasında “Elektron ticarət haqqında” qanuna təklif edilən dəyişiklik müzakirəyə çıxarılıb və layihə birinci oxunuşda qəbul edilib. Dəyişiklik qanunun yalnız ölkə ərazisindəki elektron ticarətə tətbiqini nəzərdə tutan müddəanın ləğvini nəzərdə tutur.

Layihəyə əsasən, qanuna “texnoloji neytrallıq” anlayışı və müvafiq prinsip daxil edilir. Bu prinsip elektron ticarət münasibətlərində normativ hüquqi aktlarla hər hansı texnologiyanın üstün tutulmaması, tətbiqində məhdudiyyətlərin qoyulmaması və müxtəlif texnoloji həllərin bərabər qəbul olunması deməkdir.

Eyni zamanda ödənişlə bağlı müddəalar təkmilləşdirilir, elektron ticarət sahəsində ödəniş üsullarının təkmilləşdirilməsindən irəli gələn bəzi uyğunlaşdırıcı dəyişikliklər edilir.