Əczaçılıq istehsalı 60.4% artıb, Pirallahı parkında portfel 175.6 milyon manatdır

Azərbaycanda bu ilin yanvar-sentyabr aylarında 32.9 milyon manatlıq əczaçılıq məhsulu istehsal edilib. Dövlət Statistika Komitəsinin məlumatına görə, ötən ilin eyni dövrü ilə müqayisədə istehsalın dəyəri 60.4% artıb, dərman istehsalı isə illik ifadədə 92.8% çox olub.

Əczaçılıq sənayesi qeyri-neft-qaz sektorunun şaxələndirilməsi və yerli istehsalın genişləndirilməsi baxımından diqqət çəkir. Sahə dərman istehsalı ilə yanaşı, kimya sənayesi, laboratoriya tədqiqatları, qablaşdırma və logistika ilə əlaqələri də genişləndirir. Sənaye parklarında sahibkarlar üçün güzəştlər tətbiq olunur.

Pirallahı Sənaye Parkı bu sahədə ayrıca yer tutur. Parkda 6 rezident qeydiyyatdan keçib, ümumi investisiya portfeli 175.6 milyon manatdır. Bunun 111.3 milyon manatı artıq layihələrin icrasına yönəldilib. Rezidentlər indiyədək 82.2 milyon manat dəyərində məhsul istehsal edib, 215 nəfər daimi işlə təmin olunub.

Rezidentlər qeydiyyata alındıqları tarixdən 10 il müddətinə əmlak, torpaq və mənfəət vergilərindən azaddır. İstehsal məqsədilə xaricdən gətirilən texnika və avadanlıqlar ƏDV-dən və gömrük rüsumlarından azaddır.

Parkın müəssisələrindən “R-Pharm” MMC-nin investisiya dəyəri 16 milyon ABŞ dollarıdır, illik istehsal gücü 250 milyon ədəd həb və kapsuldur. Müəssisə Azərbaycanda GMP sertifikatı alan ilk əczaçılıq müəssisəsi olub.

“Gen Pharma Caucasus Manufacturing Operations” müəssisəsi 2023-cü ildə parkın rezidenti statusu alıb. Təsisçiləri Türkiyənin “Gen İlaç ve Sağlık Ürünleri Sanayi A.Ş.” şirkəti, İqtisadiyyat Nazirliyinin tabeliyində Azərbaycan Biznesinin İnkişafı Fondu və Türkiyənin “SİA Pharmaceuticals” şirkətidir. Ümumi dəyəri 113.9 milyon manat olan layihənin maliyyələşməsində fondun 13.2 milyon manat investisiyasından və 10 milyon manat güzəştli kredit vəsaitindən istifadə edilib. Müəssisə 7 milyon manatdan çox ƏDV və gömrük rüsumlarından azad olunub. Ərazisi 5.2 hektar olan müəssisənin illik istehsal gücü 60 milyon qutu dərman, o cümlədən 2.5 milyard tablet və kapsuldur.