Beynəlxalq maliyyə institutlarının Azərbaycana yatırımı III rübdə 185 milyon dollara çatıb

Bu ilin III rübündə beynəlxalq maliyyə institutları Azərbaycan iqtisadiyyatına 185 milyon ABŞ dolları həcmində qeyri-suveren maliyyələşdirmə yönəldib. Avrasiya İnkişaf Bankının analitik icmalına görə, ötən ilin eyni dövründə bu göstərici 42 milyon dollar olub, yəni cari rəqəm ondan 4.4 dəfə çoxdur.

Artım Avropa Yenidənqurma və İnkişaf Bankının (EBRD), Asiya İnfrastruktur İnvestisiya Bankının (AIIB), OPEC Beynəlxalq İnkişaf Fondunun və Qara Dəniz Ticarət və İnkişaf Bankının (BSTDB) iştirakı ilə zəmanət və infrastruktur əməliyyatlarının genişlənməsi hesabına baş verib.

Rübün ən böyük əqdlərindən biri EBRD-in «AccessBank»a verdiyi portfel zəmanətidir. Limit 75 milyon avroyadək, təxminən 86 milyon ABŞ dollarıdır. Zəmanət kiçik və orta biznesə verilən borclar üzrə kredit riskinin 50%-dək hissəsini əhatə edir. Doqquz ay ərzində EBRD-in layihələri əsasən maliyyə sahəsində cəmlənib, prioritet istiqamətlər Azərbaycan və Özbəkistan olub.

III rübdə AIIB Xəzər dənizi suyunun duzsuzlaşdırılması zavodunun tikintisi üçün 45 milyon ABŞ dolları kredit ayırıb. Bu, bankın Azərbaycanın su sektorunda təsdiqlədiyi ilk layihədir. OPEC Fondu da həmin layihənin birgə maliyyələşdirilməsinə 40 milyon ABŞ dolları borcla qoşulub. Bu təşəbbüslər sayəsində regionun su təsərrüfatı sektoruna beynəlxalq maliyyə təşkilatlarının yatırımları 85 milyon ABŞ dollarına çatıb, seqmentin mərkəzi layihəsi Azərbaycanın duzsuzlaşdırma zavodu olub.

Sutkada təxminən 300 min kubmetr su gücünə malik obyekt ölkədə ilk irimiqyaslı duzsuzlaşdırma müəssisəsi və su sektorunda ilk dövlət-özəl tərəfdaşlığı layihəsi olacaq.