«Bank Respublika» «AccessBank»ın səhmlərinin 100%-ni əldə edib

«Bank Respublika» ASC və «AccessBank» QSC strateji əqdin uğurla başa çatdığını açıqlayıb. Əqdin nəticəsində «Bank Respublika» «AccessBank»ın səhmlərinin 100%-ni əldə edib. «AccessBank»ın əvvəlki səhmdarları isə «Bank Respublika»nın yeni emissiya edilmiş imtiyazlı səhmlərini alaraq onun səhmdarları sırasına qoşulub.

Bankların açıqlamasına görə, əqd iki qurumun maliyyə potensialını, peşəkar təcrübəsini və bir-birini tamamlayan biznes modellərini bir araya gətirib. Növbəti mərhələdə hüquqi və əməliyyat birləşməsi «Bank Respublika» brendi altında Azərbaycanın ən böyük banklarından birini formalaşdıracaq.

Birləşmə tamamlanana qədər hər iki bank mövcud brendləri altında işləyəcək. Müştərilərə fasiləsiz xidmət göstərilməsi, müştərilər və tərəfdaşlar qarşısında bütün öhdəliklərin yerinə yetirilməsi təmin olunacaq.

Kadr dəyişiklikləri də bəlli olub. Birləşməyə hazırlıq çərçivəsində «AccessBank»ın İdarə Heyətinə Tariyel İsmayılov rəhbərlik edəcək, sonra o, birləşmiş bankın İdarə Heyətinin sədri olacaq. «Bank Respublika»nın İdarə Heyətinin sədri vəzifəsinin müvəqqəti icrası sədr müavini Aslan Abbasa həvalə edilib.

«Bank Respublika»nın Müşahidə Şurasının sədri Şakir Rəhimov əqdin başa çatmasını şərh edib. Onun sözlərinə görə, bu irimiqyaslı əqdin uğurla tamamlanması Azərbaycanda əlverişli investisiya mühitinin, bank sektorunun dayanıqlılığının və beynəlxalq investorların onun perspektivlərinə etimadının göstəricisidir. Rəhimov iki bankın potensialının birləşdirilməsinin ölkənin maliyyə bazarının gələcək inkişafında mühüm addım olacağını bildirib. O, Azərbaycan Mərkəzi Bankına, hər iki bankın səhmdarlarına, müştərilərə, tərəfdaş banklara, beynəlxalq maliyyə institutlarına və əqdin bütün iştirakçılarına etimaya, əməkdaşlığa və dəstəyə görə təşəkkür edib.

Açıqlamada qeyd olunur ki, birləşmə bankın maliyyə mövqelərini möhkəmləndirməyə, biznesin maliyyələşdirilməsi imkanlarını genişləndirməyə, əməliyyat səmərəliliyini artırmağa, rəqəmsal xidmət kanallarının inkişafını sürətləndirməyə və bank xidmətlərinin keyfiyyətini yüksəltməyə imkan verəcək.