Bakıda torpaq sahələri oktyabrda orta hesabla 17.9% bahalaşıb

Azərbaycan Qiymətləndiricilər Cəmiyyətinin (AQC) məlumatına görə, bu ilin oktyabrında Bakıda torpaq sahələrinin dəyəri orta hesabla 17.9% bahalaşıb.

Rayonlar üzrə ən böyük artım Səbaildə qeydə alınıb — 29.1%. Yasamalda torpaq sahələrinin qiyməti 27.1%, Nəsimidə 24.5%, Nizamidə 22.3% yüksəlib. Xəzərdə bahalaşma 20.2%, Nərimanovda 19.7%, Xətaidə 16.5% olub.

Daha mülayim artım Binəqədidə (14.9%), Sabunçuda (12.3%), Suraxanıda (11.2%), Pirallahıda (8.6%) və Qaradağda (8%) qeydə alınıb.

AQC bildirir ki, paytaxtın daşınmaz əmlak bazarında qiymət dəyişiklikləri bütün rayonlarda və əmlak kateqoriyalarında eyni templə getməyib. Bahalaşmanın sürəti əmlakın tipindən, coğrafi mövqeyindən, bazarda formalaşan tələb-təklif nisbətindən, ərazinin spesifik xüsusiyyətlərindən və alıcıların davranış modellərindən asılı olaraq dəyişib.

Qiymətləndirmə prosesində AQC bazar qiymətlərinin analizini, əvvəlki dövrlərlə müqayisəli təhlilləri, rayonlar arasındakı qiymət fərqlərini, bazar iştirakçılarının və mütəxəssislərin fikirlərini, sorğu məlumatlarını, həmçinin tələb-təklif dinamikasını nəzərdən keçirib. Rayonlar üzrə orta göstəricilərin müəyyən edilməsində ərazilərin bazardakı payı və əhali faktoru da hesablamaya daxil edilib.