ETAGI Azerbaijan: daşınmaz əmlaka investisiya marağı artacaq

ETAGI Azerbaijan şirkətinin Baş Əməliyyat Direktoru Mədət Əlimədətli daşınmaz əmlak sektoruna investisiya marağının artacağını bildirib. O, bunu Fins.az-a açıqlamasında Bakıda keçirilən AIREX 2026 beynəlxalq daşınmaz əmlak sərgisi çərçivəsində deyib.

Əlimədətlinin sözlərinə görə, Azərbaycanda daşınmaz əmlak bazarı inkişaf edir, tikinti sektorunda yeni layihələrin sayı artır. Ağ Şəhər, Koroğlu istiqaməti və digər ərazilərdəki genişmiqyaslı layihələr bazarın coğrafiyasını və təklif strukturunu dəyişir. Onun fikrincə, yeni layihələr ortaya çıxdıqca onların maliyyələşdirilməsi və inkişafı üçün əlavə investisiya ehtiyacı yaranır.

Şirkətin baş əməliyyat direktoru qeyd edib ki, alıcıların mənzil seçimində yanaşması dəyişib. Əvvəllər əsas diqqət sahəyə və kvadratmetrin qiymətinə yönəlirdisə, indi yaşayış kompleksinin infrastrukturu, ərazidəki sosial və kommersiya obyektləri, istirahət imkanları və ümumi yaşayış mühiti də nəzərə alınır. Binada hovuzun, restoranın, kommersiya sahələrinin olması mənzilin cəlbediciliyinə təsir göstərir. Bəzi layihələrdə 15-20 binadan ibarət böyük yaşayış kompleksləri yaradılır, ərazi bütövlükdə abadlaşdırılır.

Əlimədətli əlavə edib ki, tikinti şirkətlərinin marketinq və satış strategiyalarında yeni yanaşmalar formalaşır, beynəlxalq sərgilərdə iştirak və potensial müştərilərlə birbaşa ünsiyyət daha əhəmiyyətli vasitələrə çevrilir. ETAGI Azerbaijan sərgidə bir neçə tikinti şirkətini və yaşayış layihəsini bir araya gətirən pavilyonla təmsil olunur, burada ümumilikdə 7-8 şirkətin layihələri təqdim edilir. Onların arasında Monaco Residence, Villa Badam, BI Group, Renaissance Group və Art Tower var. Sərgi çərçivəsində pavilyonda təmsil olunan şirkətlər ziyarətçilərə üç gün ərzində xüsusi təkliflər və eksklüziv satış şərtləri təqdim edir.

4-6 noyabr tarixlərində Bakı Ekspo Mərkəzində keçirilən AIREX 2026 Azərbaycanın ilk beynəlxalq daşınmaz əmlak sərgisidir. Sərgi PAŞA Real Estate Qrup, Baku City Residences, Sea Breeze, PMD Group, Bakı Ağ Şəhər və ABB-nin sponsorluğu, Times Consulting-in strateji tərəfdaşlığı və bir sıra dövlət qurumlarının dəstəyi ilə yerli və beynəlxalq tikinti şirkətlərini, daşınmaz əmlak agentliklərini, investorları və mənzil alıcılarını bir araya gətirir.