Azərbaycanda 10 ayda avtomobil yanacağı satışı 3.8% artıb

Bu ilin yanvar-oktyabr aylarında Azərbaycanda pərakəndə ticarət şəbəkəsində istehlakçılara 3 milyard 462.5 milyon manatlıq avtomobil yanacağı satılıb. Dövlət Statistika Komitəsinin məlumatına görə, bu göstərici 2025-ci ilin ilk 10 ayı ilə müqayisədə 3.8% çoxdur.

Həmin dövrdə alıcıların son istehlak məqsədilə aldıqları mallara xərclədiyi vəsaitin 6%-i avtomobil benzini və dizel yanacağının alınmasına sərf olunub.

Ümumilikdə, yanvar-oktyabr aylarında pərakəndə ticarət şəbəkəsində istehlakçılara 57 milyard 523.4 milyon manatlıq mal satılıb. Bunun 31 milyard 058.6 milyon manatı ərzaq məhsulları, içkilər və tütün məmulatları, 26 milyard 464.8 milyon manatı qeyri-ərzaq mallarıdır.

Statistika Komitəsinin məlumatına görə, 2025-ci ilin yanvar-oktyabr ayları ilə müqayisədə pərakəndə ticarət dövriyyəsi real ifadədə 3.8% artıb. Ərzaq məhsulları, içkilər və tütün məmulatları üzrə artım 1.5%, qeyri-ərzaq malları üzrə isə 6.6% olub.