WhatsApp Business nədir: tətbiq, API və mesajın qiyməti

WhatsApp Business Meta-nın kiçik biznes üçün hazırladığı ayrıca tətbiqdir və Android ilə iPhone-a pulsuz yüklənir. Müştəri sizə yenə adi WhatsApp-dan yazır, sadəcə adınızın altında iş saatı, ünvan və mallarınızın kataloqu açılır. Çoxlu mesaj göndərən şirkətlər messencerə WhatsApp Business Platform, yəni API ilə qoşulurlar. Orada telefon tətbiqi olmur, mesajları proqram və ya operator paneli göndərir və hər çatdırılan mesaj üçün Meta-ya pul ödənilir.

Azərbaycanda kiçik ticarətin xeyli hissəsi elə WhatsApp-dan keçir. 7 noyabrda lalafo.az-da whatsapp business sözləri ilə axtarışın birinci səhifəsinə 20 elan çıxdı və onların heç biri bu tətbiqlə bağlı xidmət deyildi. Qaz peçi, anbar rəfi, foto fonu satanlar, Xırdalanda yataqxana kirayə verənlər mətndə sadəcə əlaqə üçün WhatsApp yazmışdılar, yataqxananın doqquz elanı da eyni sahibkarın idi.

Mündəricat:

• WhatsApp Business nədir və adi WhatsApp-dan nə ilə fərqlənir?
• Profil, kataloq və avtomatik mesajlar
• Instagram və Facebook ilə bağlamaq
• Reklamdan çatdırılmaya bir satış yazışması
• WhatsApp Business Platform (API) nə vaxt lazımdır?
• API-də bir mesajın qiyməti
• Təsdiq nişanı və saxta hesablar
• Nömrə niyə bloklanır?
• Müştəri yazışmaları kimdə qalır?
• ChatGPT və süni intellektlə avtomatik cavab
• WhatsApp’dan pul qazanmaq təklifləri

WhatsApp Business nədir və adi WhatsApp-dan nə ilə fərqlənir?

Hər üç variant eyni messencerdir və müştəri heç nə quraşdırmır. Fərqi biznes tərəfi hiss edir, çünki kimin, neçə adama və hansı mesajı avtomatik göndərdiyi, bunun üçün kimin pul ödədiyi dəyişir.

Nə lazımdır	Adi WhatsApp	WhatsApp Business tətbiqi	WhatsApp Business Platform (API)
Qiyməti	pulsuz	pulsuz; pullu toplu göndəriş yalnız bəzi ölkələrdə	çatdırılan hər şablon mesaja ödəniş, servis cavablarının ayda ilk 1,000-i pulsuz
Nömrə	mobil	mobil və ya stasionar (kod zənglə gəlir)	ayrıca nömrə və ya Business tətbiqindəki nömrə
Biznes profili, kataloq	yoxdur	var	profil var, yazışmaları panel və ya proqram göstərir
Avtomatik cavab	yoxdur	salamlama, uzaqda olma mesajı, 50-yə qədər hazır cavab	istənilən ssenari, bot, süni intellekt; insana ötürmə yolu məcburidir
Çox adama mesaj	yayım siyahısı, 256 nəfərə qədər	eyni siyahılar, mesaj yalnız nömrənizi saxlayanlara çatır	təsdiqlənmiş şablonla; yeni hesab sutkada 250 nəfərə ilk mesajı yazır, hədd sonra 2,000-ə və yuxarı qalxır
Kimə uyğundur	şəxsi yazışma	bir-üç satıcının cavab verdiyi mağaza, salon, usta	çox operator, CRM, sifariş statusu, bot

Mənbə: WhatsApp Kömək Mərkəzi və Meta for Developers səhifələri, noyabr 2026.

Adi WhatsApp-dakı nömrəni Business tətbiqinə köçürmək olur və yazışmalar, şəkillər də onunla keçir. Bir nömrə iki tətbiqdə eyni anda işləmir. WhatsApp-ın öz kontaktlarını Business tətbiqi hələ tanımır və köçəndə onlar itir, buna görə də əvvəlcə onları telefonun ünvan kitabçasına yazmaq lazımdır. Geri, adi WhatsApp-a qayıdanda kataloq və kolleksiyalar keçmir.

Profil, kataloq və avtomatik mesajlar

Ayarların çoxu tətbiqin Alətlər (Tools) bölməsindədir. Menyu adları telefonun dilinə görə dəyişdiyi üçün aşağıda ingiliscə adını da mötərizədə veririk.

Biznes profili

Profilə ad, kateqoriya, ünvan, iş saatları, e-poçt və sayt yazılır. İş saatları boş qalanda uzaqda olma mesajının iş saatından kənar rejimi açılmır.

Kataloq

Hər mal və ya xidmət üçün kataloqa 10 şəklə qədər, ad, mənşə ölkəsi, istəsəniz qiymət və təsvir əlavə olunur. Malları kolleksiyalara bölmək olar, məsələn, qadın paltoları, uşaq geyimi və endirimdə olanlar ayrı-ayrı. Hər məhsulun və bütün kataloqun linki avtomatik yaranır və onu dəyişmək olmur. Instagram hekayəsində bu linki paylaşan mağaza Direct-də eyni şəkli gün ərzində dəfələrlə göndərmir.

Salamlama və uzaqda olma mesajı

Salamlama mesajı (Greeting message) müştəri sizə ilk dəfə yazanda və ya 14 gün susqunluqdan sonra yenidən yazanda gedir. Uzaqda olma mesajı (Away message) cədvəllə işləyir və həmişə, seçdiyiniz saatlarda və ya iş saatından kənar göndərilir. Hər ikisini telefon göndərir, telefon internetsiz qalanda gecə yazan müştəri cavab almır.

Salamlama mətni üçün bir variant:

Salam! Mesajınızı aldıq. Qiymət, ölçü və çatdırılma suallarına 10:00–19:00 arası cavab veririk. Bütün modellər kataloqdadır: [kataloq linki]. Sifariş üçün adınızı, ünvanınızı və bəyəndiyiniz modelin şəklini göndərin.

Sürətli cavablar

Tətbiqdə 50-yə qədər hazır cavab (Quick replies) saxlanır. Hər birinə qısa açar söz verilir, söhbətdə / işarəsindən sonra çağırılır və göndərməzdən əvvəl mətni düzəltmək mümkündür. Telefonda hazır cavaba şəkil və video qoşulur, amma veb və kompüter versiyasında media getmir. Silinən hazır cavab bərpa olunmur və mətnlərin surətini ayrıca faylda saxlayan satıcı onu bir dəqiqəyə yenidən yaradır. Profil doldurulduqca tətbiq ünvanı və iş saatını özü hazır cavaba çevirir.

Geyim mağazası üçün başlanğıc dəsti belə ola bilər:

• /olcu — ölçü cədvəlinin şəkli və bir sual: hansı boyu və çəkini nəzərə alaq?
• /catdirilma — Bakı daxilində və regionlara çatdırılmanın müddəti və qiyməti;
• /odenis — kartla, linklə və ya kuryerə nağd ödəniş qaydası;
• /qaytarma — neçə gün ərzində və hansı vəziyyətdə mal geri alınır;
• /unvan — mağazanın ünvanı, xəritə linki və iş saatı.

Etiketlər

Etiketlər (Labels) söhbətləri rəngli qruplara bölür: yeni müraciət, ödəniş gözlənilir, göndərildi, qaytarma. Ay sonunda göndərildi etiketli söhbətlərin sayı reklamdan gələn müraciətlərin neçəsinin satışa çevrildiyini kobud da olsa göstərir.

QR kod və qısa link

Qısa link hesab açılan kimi yaranır və QR kod da onunla bir bölmədədir. Koda 140 simvola qədər hazır mesaj bağlamaq olar, məsələn, «Vitrindəki paltoya baxıram». Kodu siz sıfırlamasanız və ya hesabı silməsəniz, onun vaxtı bitmir və kassanın yanındakı, paketin üstündəki kod eyni qalır.

Instagram və Facebook ilə necə bağlanır?

Alətlər bölməsindəki Facebook və Instagram bəndindən peşəkar Instagram hesabını və Facebook səhifəsini WhatsApp Business-ə qoşursunuz. Bundan sonra Instagram profilində və səhifədə WhatsApp düyməsi görünür. Facebook səhifəsinin admini olmalısınız, bir səhifə də eyni anda yalnız bir WhatsApp Business hesabına bağlanır.

Bağlantının əsas faydası reklamda üzə çıxır. Click-to-WhatsApp reklamı müştərini birbaşa yazışmaya gətirir, kabinet də bir söhbətin neçəyə başa gəldiyini göstərir. Kanalların müqayisəsi və mesajın qiymətinin hesablanması biznes üçün onlayn reklam bələdçisində var. Səhifəni gündəlik aparmağı agentliyə tapşıranlar bilməlidir ki, gələn yazışmalar çox vaxt SMM paketinə daxil olmur və SMM agentliyinin xidmət paketləri bu bölgünü göstərir.

Reklamdan çatdırılmaya bir satış yazışması

Tutaq ki, Bakıda qadın paltosu satan Instagram mağazası Click-to-WhatsApp reklamı verib. Mağaza və addımlar uydurmadır, alətlər pulsuz tətbiqdə hazır olanlardır.

1. Müştəri reklamdakı düyməni basır, söhbət reklamın hazır mətni ilə açılır. Salamlama mesajı kataloq linkini və iş saatını göndərir, satıcı söhbətə yeni müraciət etiketi qoyur.
2. Müştəri ölçünü soruşur. Satıcı /olcu cavabı ilə ölçü cədvəlinin şəklini atır və rəngi soruşur.
3. Rəng seçiləndə satıcı kataloqdan həmin modeli söhbətə göndərir, müştəri onu səbətə qoyub sifariş verir.
4. Ödəniş tətbiqdən kənarda, bank linki ilə və ya kuryerə nağd edilir. Etiket ödəniş gözlənilir olur.
5. Kuryer yola düşəndə etiket göndərildi olur. Ertəsi gün satıcı paltonun ölçüsə düşüb-düşmədiyini əl ilə soruşur.
6. Gələn ay yeni kolleksiyanın mesajı yalnız buna razılıq vermiş müştərilərə gedir.

Bu ardıcıllığın hər addımı pulsuz tətbiqdə var. Tətbiq iki yerdə dar gəlir, sifariş statusunu hər müştəriyə avtomatik göndərmək lazım olanda və yazışmaları satış sistemi (CRM) ilə birləşdirmək istəyəndə.

WhatsApp Business Platform (API) nə vaxt lazımdır?

Platformada mesajlar Meta-nın Cloud API-si ilə gedir. Biznes onu öz proqramçısı ilə və ya Meta-nın tərəfdaşı olan xidmət şirkəti (BSP) ilə qoşur, yazışmaları operator panelində görür.

Platformanın əsas qaydası 24 saatlıq pəncərədir. Müştəri yazandan sonra 24 saat ərzində istənilən mətnlə cavab vermək olur, bu vaxt keçəndə yalnız Meta-nın əvvəlcədən təsdiqlədiyi şablonla yazırsınız. Yeni biznes portfeli sutka ərzində öz təşəbbüsü ilə 250 müxtəlif nömrəyə mesaj göndərə bilir. Biznes yoxlamasından keçəndə və ya 30 gündə 2,000 keyfiyyətli mesaj göndərəndə hədd 2,000-ə qalxır, sonrakı pillələr 10,000, 100,000 və limitsizdir (Meta-nın mesaj limitləri).

Biznes yoxlamasında Meta şirkətin hüquqi adını və ünvanını dövlət sənədi ilə tutuşdurur, buna görə də bu yolu qeydiyyatı olan biznes keçir. Qeydiyyatın özü VÖEN almaq və şirkət açmaq haqqında bələdçidə addım-addım verilib.

Business tətbiqi ilə API eyni nömrədə birgə də işləyə bilir, Meta bunu coexistence adlandırır. Bu halda son altı ayın yazışmaları sinxronlaşır, lakin tətbiqdəki yayım siyahıları yalnız oxunur olur, qrup söhbətləri API-yə keçmir, bağlı cihazlar da ayrılır və yenidən bağlanmalıdır.

Kiçik biznesin API-yə tələsməyə ehtiyacı yoxdur.

İki satıcısı və bir telefonu olan mağazanın əsas problemi gec cavabdır və onu hazır cavablar ilə etiketlər həll edir. API-yə keçmək üçün aydın səbəb sifariş statusu, qəbul xatırlatması və təsdiq kodu kimi avtomatik mesajlardır, çünki tətbiq bunları göndərmir. Belə botları başqa bizneslərə quraşdırıb satmağın hesabı çat-bot hazırlama xidməti kartında var. Bir neçə prosesi birlikdə avtomatlaşdıran işin modelini AI avtomatlaşdırma agentliyi ideyası təsvir edir.

API-də bir mesaj neçəyə başa gəlir?

Meta 1 iyul 2025-dən söhbət əvəzinə çatdırılan hər mesaj üçün pul alır. Qiymət mesajın növündən və alıcının ölkə kodundan asılıdır. Azərbaycanın (+994) ayrıca tarifi yoxdur, Meta-nın qiymət səhifəsində o, Rest of Central & Eastern Europe regionuna daxildir.

Mesaj növü	Nə üçündür	Bir mesaj
Marketinq şablonu	aksiya, yeni kolleksiya, endirim	0.0989 $ (~0.17 ₼)
Utility şablonu	sifariş statusu, qəbul xatırlatması	0.0244 $ (~0.04 ₼)
Autentifikasiya	təsdiq kodu	0.0244 $ (~0.04 ₼)
Servis cavabı	müştəri yazandan sonra 24 saat ərzində cavab	ayda ilk 1,000-i pulsuz, sonra 0.0244 $
Meta Business Agent	Meta-nın süni intellekt agentinin cavabı	1 milyon token üçün 2 $, Meta-nın hesabı ilə mesaja 4–5 sent

Mənbə: Meta for Developers, WhatsApp Business Platform pricing; regional tarif Meta-nın tərəfdaşı Gallabox-un rate card sənədindən, 1 oktyabr 2026-dan qüvvədədir. Manata Mərkəzi Bankın 7 noyabr məzənnəsi ilə çevrilib (1 $ = 1.70 ₼).

Ən təzə dəyişiklik 1 oktyabr 2026-da oldu. Meta 2024-cü ilin noyabrından pulsuz olan servis cavablarına yenidən haqq qoydu və hər nömrəyə ayda 1,000 pulsuz mesaj saxladı. İstifadə olunmayan qalıq növbəti aya keçmir. Açıq pəncərədə göndərilən utility mesajları da həmin gündən pulludur.

30 sentyabra qədər ödəniş üsulu əlavə etməyən bizneslərə Meta servis mesajlarını çatdırmayacağını da yazıb.

Tariflər yerində durmur, 2026-da onlar yanvar, aprel, iyul və oktyabrda yeniləndi.

Reklamla gələn müştəri üçün ayrıca qayda var. Click-to-WhatsApp reklamından Android və ya iPhone ilə yazan adama pəncərə daxilində cavab verəndə pulsuz giriş pəncərəsi açılır, Meta-nın səhifəsinə görə o, 7 günə qədər açıq qala bilir. Bu müddətdə şablon və servis mesajları pul tutmur, ancaq Meta Business Agent-in cavabları yenə ödənilir.

Ayda 1,200 sifariş alan onlayn mağazanı götürək. O, hər sifarişə bir status mesajı göndərir, ayda iki dəfə 800 müştəriyə aksiya yazır və 1,500 suala cavab verir.

• Status mesajları: 1,200 utility şablonu təxminən 30 $ edir.
• İki aksiya: 1,600 marketinq mesajı ~160 $ tutur.
• Suallara cavab: ilk 1,000-i pulsuzdur, qalan 500 mesaj təxminən 12 $-dır.

Ay üzrə Meta-ya təxminən 200 $, yəni ~340 ₼ gedir və bunun dörddə üçündən çoxu aksiyaların payıdır. Xidmət şirkətinin abunəsi və botun hazırlanması bu rəqəmə daxil deyil.

Təsdiq nişanı və saxta hesablar

10 avqust 2026-da Dövlət Təhlükəsizlik Xidməti xaricdən idarə olunan kibercinayətkar şəbəkənin bəzi üzvlərini müəyyən etdiyini açıqladı. Report.az-ın xəbərində sxem təsvir olunub. Qurum rəhbərlərinin adı və şəkli ilə saxta WhatsApp hesabları açılır, dövlət qulluqçularına və şirkət işçilərinə təcili mesaj gedir, sonra ikinci saxta hesab özünü hüquq-mühafizə əməkdaşı kimi təqdim edib xaricdəki hesablara pul köçürməyi istəyirdi. Nömrələr Azərbaycan operatorlarına aid idi, işçilərin əlaqə məlumatlarını isə cinayətkarlar qurumların rəsmi saytlarından xüsusi proqramla toplayırdılar.

Mağazanın müştərisini də eyni yolla aldatmaq olar, loqo və adla açılan başqa nömrə ön ödəniş istəyir. WhatsApp-da bunun rəsmi cavabı təsdiq nişanıdır. Meta onu Meta Verified abunəsi ilə verir, amma abunə nişanı avtomatik gətirmir. Biznes ya Meta platformalarındakı fəaliyyətinə görə yoxlanır, ya da ondan sənəd istənir, nişan sonradan geri də alına bilər (WhatsApp, təsdiqlənmiş biznes hesabları).

Meta Verified Business tətbiqində 2024-cü ilin iyununda Braziliya, Hindistan, İndoneziya və Kolumbiyada başladı.

Meta sonrakı ölkələrin siyahısını açıqlamayıb, Azərbaycanda bu xidmətin olub-olmadığını tətbiqin Alətlər bölməsindəki Meta Verified bəndi göstərir.

Nişan olmayanda da müştəriyə yoxlama imkanı vermək olar. Saytda, Instagram bio-sunda və qəbzdə eyni nömrə yazılır, kart nömrəsi yalnız bu nömrədən göndərilir və bu qayda profildə bir cümlə ilə qeyd olunur. Belə mağazanın müştərisi başqa nömrədən gələn ödəniş tələbini tez tanıyır. Hələ saytı olmayanlar sadə vizit saytının qiymətini kiçik biznesə sayt hazırlamaq ideyasında görə bilərlər.

Nömrə niyə bloklanır?

WhatsApp toplu və avtomatik mesajları maşın öyrənməsi ilə tutur, istifadəçilərin şikayətlərini də sayır. Kömək mərkəzinin məsuliyyətli istifadə qaydalarında açıq yazılıb ki, dəfələrlə şikayət edilən hesablar bağlanır. Riskli hərəkətlərin siyahısı uzun deyil.

• Nömrəsini sizə özü verməyən adamlara yazmaq.
• Alınmış və ya başqa saytlardan yığılmış nömrə bazasına aksiya göndərmək.
• Yayım siyahısını tez-tez işlətmək. Nömrənizi saxlamayanlar mesajı almır, alanların bir hissəsi şikayət düyməsini basır.
• Adamı razılığı olmadan qrupa salmaq.
• WhatsApp-ın dəyişdirilmiş versiyaları və toplu göndəriş proqramları.

WhatsApp Business Messaging Policy yazmaq üçün əvvəlcədən razılıq tələb edir və mesajları dayandırmağı istəyən adamın sözünə, bu istək WhatsApp-dan kənarda deyilsə belə, əməl etməyi şərt qoyur. Siyasət çoxsəviyyəli marketinqi (MLM), tanışlıq xidmətlərini, böyüklər üçün malları, qısamüddətli borcu və borc yığımını WhatsApp ilə satmağı qadağan edir. Spirtli içki, qumar və reseptsiz dərman kimi tənzimlənən mallar barədə yazışma Business tətbiqində heç olmur.

Bloklanma riskini ən çox artıran addım çox vaxt ilk həftədə atılır, yeni nömrədən köhnə müştəri bazasına eyni aksiya gedəndə. O adamların çoxu bu nömrəni tanımır və mesajı spam kimi işarələyir.

Müştəri yazışmaları kimdə qalır?

Business tətbiqində yazışma adi WhatsApp kimi şifrələnir və telefonda, onun ehtiyat nüsxəsində saxlanır. API-də vəziyyət başqadır. Mesajları xidmət şirkətinin sistemi və Cloud API emal edir, botun cavabını yazan süni intellekt xidməti də yazışmanın mətnini alır. Meta Business Agent haqqında WhatsApp-ın öz kömək səhifəsi deyir ki, agent səssizə alınsa belə, süni intellektli söhbətlərdəki mesajları Meta öz süni intellektini təkmilləşdirmək üçün toplayır.

Müştərinin adı, nömrəsi və ünvanı fərdi məlumatdır. «Fərdi məlumatlar haqqında» Qanunun 14-cü maddəsi belə məlumatın xaricə ötürülməsini qəbul edən ölkə Azərbaycan səviyyəsində qorunma təmin etmədikdə qadağan edir, subyektin razılığı olanda icazə verir (qanunun mətni AFSA saytında). Yazışmanı xaricdəki AI xidmətinə göndərən botun bu maddəyə necə düşdüyünü hüquqşünasla dəqiqləşdirin. Salamlama mesajında məlumatın nə üçün işləndiyini deyən bir cümlə müştərinin razılığını yazılı izə çevirir.

ChatGPT və süni intellektlə avtomatik cavab vermək olarmı?

WhatsApp-da süni intellektin rəsmi yolu ikidir. Meta-nın öz agenti olan Meta Business Agent Business tətbiqində hələlik məhdud ölkələrdə seçilmiş bizneslərə açılıb və iş saatı, ünvan, qiymət, endirim, çatdırılma və ödəniş suallarına cavab verir. Agent qoşulanda salamlama və uzaqda olma mesajları söndürülür, satıcı söhbətə əl ilə yazanda da agent həmin müştəri ilə susur.

Digər yol API ilə qoşulan öz botunuzdur. Orada OpenAI, Anthropic və ya Google modeli bilik bazanızdan cavab yazır. WhatsApp-ın 15 yanvar 2026-da qüvvəyə minən şərtləri əsas məhsulu ümumi təyinatlı AI assistent olan şirkətləri platformada yalnız qanunun bunu tələb etdiyi bazarlarda saxlayır. TechCrunch-ın 2025-ci il oktyabr yazısına görə bu qadağa süni intellekti müştəri dəstəyində işlədən bizneslərə aid deyil. Hansı yol seçilsə də, Business Policy avtomatik cavabın yanında müştəriyə adamla danışmaq üçün aydın yol tələb edir, məsələn, söhbəti operatora ötürmək, telefon, e-poçt və ya mağazanın ünvanı.

Google-da «chatgpt azerbaycan whatsapp» yazıb ChatGPT-nin nömrəsini axtaranlara gəlincə, OpenAI-ın WhatsApp-dakı yeganə rəsmi kontaktı 1-800-ChatGPT idi. Şirkət 2025-ci ilin oktyabrında WhatsApp-ın şərtləri dəyişdiyi üçün onu 15 yanvar 2026-dan bağladığını elan etdi, səhifə bu gün də eyni bildirişi göstərir. ChatGPT indi tətbiqdə, saytda və kompüter proqramında işləyir, WhatsApp-da onun adı və loqosu ilə yazan hesablar üçüncü tərəfindir. Modelin azərbaycanca cavablarının keyfiyyəti ChatGPT-ni Azərbaycan dilində işlətmək haqqında yazıda yoxlanıb.

«Bot qoşsam, satıcıya ehtiyac qalmır?» sualının cavabı Meta-nın öz qaydalarındadır. Agent satıcı yazan kimi susur, siyasət isə insana ötürmə yolunu məcbur edir. Meta öz agenti üçün də süni intellektin cavablarının dəqiq və ya yerində olmaya biləcəyini yazır.

WhatsApp-da botun hər cavabı müştərinin telefonunda yazılı qalır və endirimi və ya çatdırılma müddətini uyduran botla mübahisədə satıcının əlində bəhanə olmur. Qiymət, stok və qaytarma şərti bota yalnız mağazanın öz cədvəlindən verilir, bilmədiyi sual adama keçir. Agentin bilik bazası ilə necə işlədiyi AI agentin iş prinsipində, satışda botun rolu çat-bot marketinqi yazısında izah olunub.

WhatsApp-a cavab verən agentin bilik bazasını və operatora ötürmə qaydasını praktikada qurmaq biznes proseslərinin avtomatlaşdırılması mövzusundadır və KURS: AI Agent & YouTube biznesi daxilində keçilir.

WhatsApp’dan pul qazanmaq təklifləri nə satır?

WhatsApp özü istifadəçiyə pul ödəmir və «WhatsApp’dan pul qazanmaq» adı ilə yayılan təkliflərin pulu başqa yerdən gəlir. 7 noyabrda lalafo.az-da whatsapp reklam sözləri ilə axtarışın birinci səhifəsindəki 20 elanın 10-u vakansiya idi və onların əksəriyyəti təcrübə tələb etmirdi. Digahdan verilmiş birində iş layihənin reklam mətnini və qrup linkini 25 nəfərin WhatsApp statusunda paylaşdırmaq, sonda ekran şəkli ilə hesabat vermək kimi təsvir olunurdu. Qiymət sətrində 5 ₼ göstərilib, amma layihənin nə olduğu və linkin hara apardığı elanda yazılmayıb.

Belə zəncirdə ilk risk elə öz nömrənizdir. Tanımadığınız qrupun linkini kontaktlara yayanda şikayətlər də sizin hesabınıza gəlir. Link piramidaya aparırsa, onu yayanlardan biri də siz olursunuz. Evdən real maaşlı işin harada axtarıldığı və qeydiyyat haqqı istəyən işəgötürənin necə tanındığı onlayn iş bələdçisində ayrıca yazılıb.

Hesabın əsası

• Dollar kursu: 1 $ = 1.70 ₼ (CBAR, 07.11.2026).
• Marketinq mesajı manatla: 0.0989 × 1.70 = 0.16813 ₼, yuvarlaq 0.17 ₼.
• Utility, autentifikasiya və servis mesajı manatla: 0.0244 × 1.70 = 0.04148 ₼, yuvarlaq 0.04 ₼.
• Status mesajları: 1,200 × 0.0244 = 29.28 $.
• Aksiya mesajlarının sayı: 2 × 800 = 1,600; pulu 1,600 × 0.0989 = 158.24 $.
• Pullu servis cavabları: 1,500 − 1,000 = 500; pulu 500 × 0.0244 = 12.2 $.
• Ay üzrə cəmi: 29.28 + 158.24 + 12.2 = 199.72 $; manatla 199.72 × 1.70 = 339.524 ₼, yuvarlaq 340 ₼.
• Aksiyaların payı: 158.24 ÷ 199.72 = 0.792, yəni təxminən 79%.
• Mağaza nümunədir: sifariş, aksiya və sual sayı bizim gümanımızdır, tariflər Meta-nın 1 oktyabr 2026 cədvəlindəndir.