Rusiyanın taxıl ixracı azalır, Baltik limanları önə çıxır

Rusiyanın taxıl ixracında cənub limanlarında yaranan logistika problemləri ixrac həcmlərini kəskin azaldıb. Ötən ilin eyni dövrü ilə müqayisədə avqustda taxıl ixracı 3.5 dəfə, sentyabrda 3.8 dəfə azalıb. Buğda tədarükündə azalma müvafiq olaraq 3.8 və 4 dəfə olub.

Mənbənin məlumatına görə, avqustda pilotsuz uçuş aparatlarının hücumlarından sonra Novorossiysk limanında üç böyük taxıl terminalının fəaliyyəti dayandırılıb. Bu obyektlərin ümumi illik gücü təxminən 26.1 milyon ton təşkil edir. Azov hövzəsində yükləmə prosesində də fasilələr yaranıb.

Daşımaların bahalaşması ixracı çətinləşdirən amillərdən biridir. Azov-Qara dəniz hövzəsində fəaliyyət göstərən iritonnajlı gəmilər üçün sığorta tarifləri 2024-cü ilin səviyyəsi ilə müqayisədə 40-60%, fraxt qiymətləri 25-35% artıb.

Rusiya ixrac coğrafiyasını dəyişməyə başlayıb. Baltik limanlarının buğda ixracındakı payı 2025-ci ildəki 2%-dən oktyabr ayına qədər 60%-ə yüksəlib. Sentyabrda Rusiyanın taxıl yükləmələrinin təxminən yarısı Baltik limanlarının payına düşüb. 2026-cı ilin avqust-sentyabr aylarında Baltik limanları vasitəsilə təxminən 2.7 milyon ton buğda ixrac olunub; 2025-ci ilin iyulundan 2026-cı ilin iyununa qədər bütöv mövsüm ərzində bu istiqamətdən təxminən 1 milyon ton buğda göndərilmişdi.

Xəzər hövzəsində Mahaçqala limanının rolu artır. Sentyabrda bu liman vasitəsilə 63 min ton taxıl göndərilib, bir il əvvəl bu göstərici təxminən 32 min ton idi. Kalininqrad limanında da sentyabrda 40.5 min ton taxıl yüklənib, halbuki bir il əvvəl limandan taxıl göndərilmirdi.