Qiymətli Kağızlar Bazarı Haqqında Qanuna Dəyişikliklə Sekyuritizasiya Çərçivəsi Təsdiq Olundu

Milli Məclisin İqtisadi siyasət, sənaye və sahibkarlıq komitəsinin bu günkü iclasında sekyuritizasiya fəaliyyətinin hüquqi çərçivəsi üzrə dəyişikliklər müzakirə olundu. “Qiymətli kağızlar bazarı haqqında” qanununa təklif edilən dəyişikliklər qəbul edildi.

Layihəyə görə, sekyuritizasiyanın predmeti arasında kredit, maliyyə icarəsi, faktorinq müqavilələri və fond birjasında listinqdə olmayan korporativ istiqrazlar üzrə yaranan pul tələbləri yer alır. Mərkəzi Bank əlavə pul tələblərini müəyyən etmək hüququna malikdir.

Normativ hüquqi aktlarla müəyyən edilmiş hallarda sahibkarlıq subyektlərinə verilmiş güzəştli kreditlər, investisiya qiymətli kağızları (listinqdə olmayan korporativ istiqrazlar istisna olmaqla), iflas prosesində olan şəxslərə verilmiş borclar, dövri ödənişlər nəzərdə tutulmayan debitor borclar və üçüncü şəxslər qarşısında yüklü aktivlər sekyuritizasiya predmetinə daxil deyil.

Sekyuritizasiyanın predmeti olan aktivlər reyestrə daxil edildiyi anda sekyuritizasiya istiqrazı sahiblərinin xeyrinə girov qoyulmuş hesab olunur. Bu istiqrazlar sekyuritizasiya şirkəti tərəfindən buraxılır və plan üzrə aktivlərdən əldə olunan pul vəsaitləri ilə ödənilir.

Qanun layihəsi səsverməyə çıxarılaraq üçüncü oxunuşda qəbul edildi.