Nazir: 2027-ci il büdcəsində sosialyönümlü xərclər 18.7 milyard manata çatacaq

2027-ci ilin dövlət büdcəsində sosialyönümlü xərclərin 1.6 milyard manat və ya 9.2% çox olmaqla 18.7 milyard manat nəzərdə tutulur. Bunu Milli Məclisin Əmək və sosial siyasət və İqtisadi siyasət, sənaye və sahibkarlıq komitələrinin birgə iclasında əmək və əhalinin sosial müdafiəsi naziri Anar Əliyev deyib.

Nazirin sözlərinə görə, sosial xərclər 222.7 milyon manat və ya 1.7% çox olmaqla 13 milyard manat olacaq. Sosialyönümlü xərclərin növbəti ilin dövlət büdcəsindəki çəkisi 44.2%-ə yüksələcək, ÜDM-də payı isə 13.3% olacaq. Cari ildə bu göstərici 12.4% idi.

Anar Əliyev bildirib ki, 2027-ci ilin dövlət büdcəsində sosial xərclərin tərkibində sosial müdafiə və sosial təminat xərclərinin 4 milyard 914 milyon manat həcmində olması proqnozlaşdırılır. 2027-ci ildə də dövlət və icmal büdcələr sosialyönümlüyünü saxlayacaq.