Kirayə gəlirindən vergi hesablananda xərclər də nəzərə alınacaq

Gələn ildən yaşayış və ya digər əmlakını icarəyə verən fiziki şəxslər kirayə gəlirindən vergi hesablanarkən xərclərini nəzərə ala biləcəklər. Bu, Vergi Məcəlləsinə təklif olunan dəyişikliklər paketində nəzərdə tutulub.

Dəyişikliyə görə, icarəyə əmlak verən fiziki şəxs vergi uçotuna daxil olub bəyannamə verməklə, bu fəaliyyətlə bağlı çəkdiyi xərcləri əldə etdiyi gəlirdən çıxmaq və Vergi Məcəlləsinin 101.3-cü maddəsindəki dərəcə ilə gəlir vergisi ödəmək hüququ qazanacaq. Bu imkandan istifadə etmək üçün şəxs vergi orqanına və icarəçiyə müvafiq formada məlumat təqdim etməlidir.

Məlumat vergi orqanına verildiyi aydan sonrakı aydan başlayaraq həmin şəxsin icarə gəlirindən ödəmə mənbəyində vergi tutulması dayanacaq. Vergi ilinin sonunda gəlir vergisi hesablanarkən şəxsin il ərzində qazandığı gəlirlər və çəkdiyi xərclər nəzərə alınacaq.

Əvvəlki dövrlərdə ödəmə mənbəyində tutulmuş vergilər hesablanmış illik gəlir vergisi məbləğindən çıxılacaq. Həmin vergilərin məbləği cari il ərzində tam nəzərə alınmadıqda, qalan hissə sonrakı illərin vergi öhdəliklərinin azaldılmasına yönəldiləcək. Sənəd 2027-ci ilin büdcə zərfinə daxil edilib.

Azərbaycanda bu ildən yaşayış sahələrinin kirayəyə verilməsindən əldə olunan gəlirlər üzrə vergi dərəcəsi 14%-dən 10%-ə endirilib. Mehmanxana və mehmanxana tipli obyektlərdə yerləşən yerləşmə vəsaitləri istisna təşkil edir. Kirayə haqqı vergi ödəyicisi qismində uçotda olmayan fiziki şəxs tərəfindən ödənildikdə, kirayəyə verən şəxs özü və ya təyin etdiyi vergi agenti vasitəsilə vergini müvafiq qaydada ödəyəcək.