İnternet provayderlərinin uçotu üçün tələb olunan sənədlərin siyahısı genişlənir
Nazirlər Kabinetinin qaydasına edilən dəyişikliklə provayderlər şəbəkə, abunəçi tutumu və keyfiyyətə nəzarət sisteminə dair sənədləri uçota təqdim edəcək.

İnternet telekommunikasiya xidməti göstərən operator və provayderlər uçota alınmaq üçün ərizə ilə müraciət edərkən daha çox sənəd təqdim edəcək. Bu, Nazirlər Kabinetinin «İnternet telekommunikasiya xidməti göstərən operatorların və provayderlərin uçotunun aparılması Qaydası»na edilən dəyişikliklərdən irəli gəlir. Məlumatı İnformasiya Kommunikasiya Texnologiyaları Agentliyi (İKTA) yayıb.
Ərizəyə xidmətin təşkili üçün qurulan telekommunikasiya şəbəkəsində istismar olunan vasitələr, şəbəkənin strukturu, abunəçi tutumunun həddi və istismara verilmə mərhələləri barədə məlumatlar daxil edilir. Provayder həmçinin telekommunikasiya şəbəkəsinin vektor xəritəsini və internet xidmətinin keyfiyyətinə, dayanıqlılığına nəzarət sisteminə malik olması barədə sənədlərin surətini təqdim edəcək.
Uçota alınma üçün ərizədə xidmət göstərilən istifadəçi kateqoriyası, xidmətin topdan, pərakəndə və ya yenidən satış formasında təqdim olunması da əksini tapacaq.
Dəyişikliklər uçota alınmış operator və provayderlər barədə ictimaiyyətə açıqlanan məlumatların dairəsini də genişləndirir. Digər məlumatlarla yanaşı, fəaliyyətin əhatə dairəsi, hüquqi və fəaliyyət ünvanı, internet informasiya ehtiyatı, fəaliyyət növü, telefon nömrəsi, elektron poçt ünvanı və müqavilə nümunəsi ictimaiyyət üçün əlçatan olacaq.
İKTA-nın məlumatına görə, yeni yanaşma quruma internet xidmətləri bazarında faktiki vəziyyəti daha dəqiq qiymətləndirmək, xidmət əhatəsinin və şəbəkə infrastrukturunun inkişafını məlumat əsaslı izləmək, keyfiyyət və dayanıqlılıq göstəriciləri üzrə monitorinq imkanlarını gücləndirmək şəraiti yaradacaq. Bunun nəticəsində istehlakçılara göstərilən internet xidmətlərinin keyfiyyətinə daha sistemli nəzarət üçün əlavə imkanlar formalaşacaq.
Tarixçə
Nazirlər Kabineti 1 xəbərMənbələr
Material AZERBUSINESS redaksiyası tərəfindən dünya və yerli bazarları, açıq mənbələri izləməklə hazırlanıb. İnvestisiya məsləhəti deyil. İstifadə şərtləri

