Bazar · 23:44
Xəbər · İqtisadiyyat

Altıncı sosial islahat paketi 2027-ci il büdcəsində maliyyələşdirilir

Əmək və əhalinin sosial müdafiəsi naziri Anar Əliyev deyib ki, 2027-ci il dövlət və icmal büdcə layihələrində altıncı sosial islahat paketi üçün maliyyə təminatı yaradılıb.

Altıncı sosial islahat paketi 2027-ci il büdcəsində maliyyələşdirilir

2027-ci ilin dövlət və icmal büdcə layihələrində sayca altıncı sosial islahat paketi üçün maliyyə təminatı yaradılıb. Bunu əmək və əhalinin sosial müdafiəsi naziri Anar Əliyev Milli Məclisin noyabrın 17-də keçirilən iclasında çıxışında deyib. Nazir bildirib ki, layihələr gələn il də sosial yönümlülüyünü saxlayacaq və əhalinin sosial müdafiəsi ilə məşğulluq imkanlarının gücləndirilməsinə ciddi maliyyə təminatı yaradacaq. Bu, Prezident İlham Əliyevin tapşırığına uyğun hazırlanıb.

Anar Əliyev son səkkiz ildə 4 milyon vətəndaşı əhatə edən beş böyük sosial islahat zərfinin icra olunduğunu xatırladıb. Onların illik əlavə maliyyə tutumu 8 milyard manat olub. Həmin islahatlar nəticəsində minimum əməkhaqqı 3.1 dəfə, orta aylıq əməkhaqqı 2.2 dəfə, minimum və orta pensiya 2.9 dəfə artıb. Sosial müavinət və təqaüd xərclərinin maliyyələşməsinə ayrılan vəsait beş dəfə yüksəlib. Yaşayış minimumu 73%, ünvanlı dövlət sosial yardımının təyin edilməsi üçün ehtiyac meyarının həddi 2.3 dəfə artıb.

Nazirin sözlərinə görə, 2018-ci ilin əvvəli ilə müqayisədə əmək müqavilələrinin sayı 597 min və ya 48% artıb, ölkə üzrə əməkhaqqı fondu 3.5 dəfə yüksəlib. Cari ilin 10 ayında pensiya ödənişləri ötən ilin müvafiq dövrünə nisbətən 10.3% artaraq 6.5 milyard manat, müavinət, təqaüd və ünvanlı dövlət sosial yardımı üzrə ödənişlər 7.9% artaraq 2.1 milyard manat olub. Orta aylıq pensiya 10.3% artaraq 596 manata, yaşa görə orta aylıq pensiya 10.1% artaraq 634 manata çatıb. Pensiya ödənişlərinin orta aylıq əməkhaqqına nisbəti 51%, yaşa görə pensiyada 54% olub ki, bu da Beynəlxalq Əmək Təşkilatının tövsiyə etdiyi 40% göstəricidən yüksəkdir. Orta aylıq əməkhaqqı 8% artaraq 1173 manat olub.

Nazir əmək və məşğulluq alt sisteminin məlumatlarına əsasən, əmək müqavilələrinin sayının ötən ilin eyni dövrünə nisbətən 1.2% artdığını da deyib. Özəl sektorda əmək müqavilələrinin sayı 5.8% və ya 59 min artıb, ölkə üzrə əməkhaqqı fondu cari il 8.5% yüksəlib.

Fotosessiya · 3 foto

1 / 3
Altıncı sosial islahat paketi 2027-ci il büdcəsində maliyyələşdirilir
Altıncı sosial islahat paketi 2027-ci il büdcəsində maliyyələşdirilir
Altıncı sosial islahat paketi 2027-ci il büdcəsində maliyyələşdirilir

Mənbələr

Material AZERBUSINESS redaksiyası tərəfindən dünya və yerli bazarları, açıq mənbələri izləməklə hazırlanıb. İnvestisiya məsləhəti deyil. İstifadə şərtləri

Aktual oxunanlar

son 36 saat
Bütün xəbərlər