Dropshipping nədir: Azərbaycandan necə başlamaq olar (2026)

Dropshipping-də anbar, qablaşdırma və kuryer satıcının işi deyil. Məhsulları seçmək, mağazanı qurmaq, alıcılar tapmaq və problem çıxanda cavab vermək isə tamamilə onun üzərində qalır. Amazon, Trendyol və başqa platformalar haqqında yazılar e-ticarət bələdçilərində toplanıb.

Dropshipping nədir və pul necə dövr edir?

Satıcı malı əvvəlcədən almır, sifarişi birbaşa tədarükçüyə ötürür. Aşağıdakı nümunə rəqəmlər pulun hansı ardıcıllıqla hərəkət etdiyini göstərir.

1. Alıcı mağazanızda məhsula kartla 30 $ ödəyir.
2. Siz eyni sifarişi tədarükçüdə 12 $-a (mal və çatdırılma, nümunə qiymət) yerləşdirir, alıcının ünvanını verirsiniz.
3. Tədarükçü bağlamanı göndərir, izləmə nömrəsini alıcıya siz ötürürsünüz.
4. Arada qalan 18 $-dan reklam, ödəniş komissiyası və qaytarmaların xərci də çıxır.

Malı tədarükçü göndərsə də, alıcıların gözündə satıcı sizsiniz. Bağlama gecikəndə, mal xarab gələndə və ya pul geri tələb olunanda müştərilər sizə yazır, çünki tədarükçünün adını heç görməyiblər. Bu modelə stoksuz satış da deyirlər.

Azərbaycandan dropshipping-ə başlamaq olar?

Olar, lakin xarici və yerli bazarda çətinliklər başqa-başqa yerdədir.

Xarici bazara satış (ABŞ, Avropa)

Mağazanı bir axşama açmaq mümkündür, kartla pul qəbulu ayrıca məsələdir. Shopify Payments-in ölkə siyahısında 41 ölkə var, Azərbaycan, Gürcüstan və Türkiyə onların arasında deyil. Stripe-ın işlədiyi ölkələr arasında da Azərbaycan yoxdur. Belə olanda satıcılar üçüncü tərəf ödəniş provayderi axtarır və ya xaricdə şirkət açırlar, ikinci yol mühasibat və hüquqi məsləhət xərcləri də gətirir.

Amazon kimi marketpleyslər satıcıların pulunu Payoneer hesabına köçürə bilir, oradan vəsait Azərbaycan bankındakı hesaba çıxarılır. Payoneer 23 fevral 2026-dan Azərbaycan üçün illik haqq şərtini dəyişib: hesaba 12 ay ərzində 6,000 dollardan az ödəniş gəlibsə, illik hesab haqqı tutulur. Kömək mərkəzinin səhifəsi bu haqqı 29.95 dollar göstərir.

Satışı az olan sınaq mağazası üçün bu, birinci ilin sonunda gələn ayrıca xərcdir.

Azərbaycan daxilində satış

Yerli satış üçün Instagram səhifəsi və ya sadə sayt, Türkiyədə və ya Bakıda tədarükçü, bir də yerli kartla ödəniş kifayət edir. Banklar və ödəniş təşkilatları (məsələn, Epoint) onlayn mağazalara kartla ödəniş qəbulu qoşur, kuryer xidmətləri də hazırdır.

Kartla ödəyən alıcılar da var. Mərkəzi Bankın Statistik bülleteni (12/2025) dekabr ayında ölkədaxili nağdsız kart ödənişlərini 10,097 mln manat göstərir və bunun 8,833 mln manatını elektron ticarətə aid edir. Bu sətrə kartdan karta köçürmələr və kommunal ödənişlər də düşə bilər, deməli rəqəm mağaza satışlarının həcmini vermir.

Yeni başlayanlar üçün yerli bazarda naməlum azdır, çünki ödəniş, çatdırılma və alıcıların dili tanışdır. Redaksiyanın orientiri belədir ki, xarici bazara 30–50 sifarişdən sonra keçmək olar: o vaxta qədər hansı məhsulun satıldığı bəlli olur.

Hansı platformada başlamaq olar?

Öz mağazası üçün Shopify, hazır alıcı kütləsi üçün Amazon uyğundur. Trendyol və TikTok Shop-a Azərbaycandan satıcı kimi qoşulmaq hələlik sadə deyil.

Platforma	Azərbaycandan qoşulmaq	Aylıq xərc	Dropshipping qaydası
Shopify	mağaza açılır, ödəniş üçün xarici provayder lazımdır	Basic: aylıq ödənişdə 27 $, illik ödənişdə ayda 19 $; ilk 3 ay ayda 1 $	icazə var; xarici provayderdə Shopify əlavə 2% tutur
Amazon	qeydiyyat qəbul edilən ölkələrin siyahısı Seller Central-dadır	Professional: ayda 39.99 $; Individual: hər satışa 0.99 $	yalnız satıcı siz olanda; bağlamada başqa mağazanın adı olmamalıdır
Trendyol	satıcı paneli Türkiyə şirkətinin rekvizitlərini istəyir	komissiya kateqoriyaya görə	Azərbaycan şirkəti üçün ayrıca qoşulma yolu göstərilmir
TikTok Shop	Avropada 10 bazar var, Azərbaycan onların arasında deyil	satış komissiyası	Azərbaycandan birbaşa başlamaq olmur

Mənbə: shopify.com/pricing, sell.amazon.com/pricing və platformaların kömək səhifələri, noyabr 2026. Shopify qiyməti ölkəyə görə dəyişə bilər.

Shopify

Brendli mağaza qurmağın sadə yolu budur, şablonlar, məhsul səhifələri və tədarükçü tətbiqləri bir yerdədir. Zəif yeri yenə ödənişdir. Xarici provayderlə işləyəndə Basic planında hər satışdan provayderin öz komissiyasından başqa 2% də Shopify-a gedir. Məhsul ideyaları Shopify üçün ideyalar siyahısında toplanıb.

Amazon

Amazon dropshipping-ə bir şərtlə icazə verir ki, alıcının gördüyü satıcı siz olasınız. Qablaşdırmada, qaimədə və bağlamada başqa satıcının adı olmamalıdır, qaytarmaları da siz qəbul edirsiniz. Başqa onlayn mağazadan alıb malı birbaşa Amazon alıcısına göndərmək bu qaydanı pozur və hesabın məhdudlaşdırılması ilə nəticələnə bilər. Satış haqqı (referral fee) kateqoriyaya görə faizlə tutulur.

FBA modelində mal əvvəlcədən Amazon anbarına göndərilir, çatdırılmanı Amazon edir. Qaydalar Amazon-da satışın əsas addımları yazısındadır, Çindən anbara göndərmənin xərci isə ayrıca hesablanıb.

Trendyol və TikTok Shop

Trendyol-un satıcı paneli Türkiyə şirkəti üçün qurulub. ikas-ın avqust 2026-da yenilənən satıcı bələdçisində mağaza açmaq üçün əvvəlcə şirkət qurmaq tələb olunur, panel MERSİS nömrəsi və KEP ünvanı istəyir. Hər ikisi Türkiyənin şirkət reyestrinə və qeydiyyatlı elektron poçt sisteminə aiddir.

TikTok Shop 15 iyun 2026-da Avstriya, Belçika, Niderland və Polşada açıldı və Avropadakı bazarlarının sayı 10-a çatdı (Net Influencer, may 2026). Bu siyahıda Azərbaycan yoxdur.

Dropshipping-ə başlamaq neçəyə başa gəlir?

Mağaza sətri ilə reklam sətrini yan-yana qoyanda büdcənin hara getdiyi görünür. Dolları manata Mərkəzi Bankın 2 noyabr 2026 məzənnəsi ilə çevirdik, 1 $ 1.70 ₼-dır.

Xərc	Minimum	Rahat sınaq	Qeyd
Mağaza (Shopify Basic, ilk 3 ay)	3 $ (5 ₼)	3 $ (5 ₼)	sonra ayda 19–27 $
Domen	12 $ (20 ₼)	20 $ (34 ₼)	illik
Tədarükçü və mağaza tətbiqləri	0 $	27 $ (46 ₼)	çoxunun pulsuz planı var
Sınaq sifarişləri (məhsulu özünə sifariş etmək)	35 $ (60 ₼)	100 $ (170 ₼)	2–4 məhsul
Reklam testi (Instagram, TikTok)	100 $ (170 ₼)	400 $ (680 ₼)	gündə 5–15 $, 2–4 həftə
Fərdi sahibkar qeydiyyatı (VÖEN)	0 $	0 $	e-taxes.gov.az üzərindən onlayn
Cəmi	150 $ (255 ₼)	550 $ (935 ₼)	ilk ay

Shopify qiyməti onun qiymət səhifəsindəndir, domen, tətbiq, sınaq sifarişi və reklam sətirləri redaksiyanın təxminidir.

Bir satışdan nə qalır?

Yuxarıdakı nümunəyə qayıdaq. Məhsul 30 $-a satılır, tədarükçüdə çatdırılma ilə 12 $-dır. Ödəniş provayderi və Shopify komissiyası birlikdə ~6%, yəni ~2 $ tutur. Bir satışa reklam xərci 10 $ olanda əldə 6 $ qalır.

On sifarişdən biri geri qaytarılanda həmin sifarişin reklamı və çatdırılması da itir, bu da bir neçə satışın qazancına bərabərdir. Rəqəmlər fərziyyədir, amma nisbət göstəricidir: tədarükçü qiymətindən sonra ikinci böyük sətir reklamdır və onu sınaqdan əvvəl bilmək olmur.

Dropshipping, FBA və öz anbarı yan-yana

Dropshipping məhsulu sınamağın ucuz yoludur. Məhsul satılmağa başlayanda mal əvvəlcədən alınarsa, bir ədədin qiyməti düşür və çatdırılma sürətlənir, buna görə də FBA və öz anbarı sonrakı mərhələdə cəlbedici olur. Modellərin fərqi malın harada saxlanmasında və riski kimin daşımasındadır.

Model	Mal kimdədir	Başlanğıc pulu	Əsas risk
Dropshipping	tədarükçüdə	az: mal əvvəlcədən alınmır	aşağı marja, çatdırılma gecikməsi
Amazon FBA	Amazon anbarında	orta: ilk partiya alınır	satılmayan mal, anbar haqqı
Öz anbarınız	sizdə	çox: mal, yer, qablaşdırma	pul malda donur

Dropshipping-də nə satmaq olar?

Universal cavab yoxdur, ancaq pis seçimləri əvvəlcədən ayırmaq olar. Məhsul bu beş süzgəcin ən azı dördündən keçməlidir.

• Yüngül və qırılmayan olsun. Ağır və şüşə mallar çatdırılma xərcini və qaytarmaları artırır.
• Satış qiyməti təxminən 20–60 $ arası olsun. Daha ucuz malda qazancı reklam aparır, daha bahalıda alıcılar tanımadıqları mağazaya etibar etmir.
• Konkret problemi həll etsin və videoda 10 saniyəyə göstərilsin. Mətbəx və avtomobil aksesuarları, ev heyvanları üçün əşyalar buna uyğundur.
• Sertifikat tələb etməsin. Kosmetika, uşaq oyuncaqları, batareyalı elektronika və qida əlavələri üçün sənəd soruşulur.
• Brend malı olmasın. Məşhur markanın analoqu saxta mal sayılır və hesabın bağlanması riski yaradır.

Tədarükçülərin keyfiyyətini, qablaşdırmasını və çatdırılma müddətini yoxlamağın ucuz yolu 2–3 məhsulu öz ünvanına sifariş etməkdir. Çin tədarükçüləri ilə işin təfərrüatı Alibaba ilə dropshipping yazısındadır.

Gömrük həddi və satıcının vergisi

Bağlama gömrükdən keçəndə kim ödəyir?

Xaricdən Azərbaycandakı alıcıya gələn bağlamada rüsum alıcının üzərinə düşür. Poçt və ya kuryerlə bir nəfərin adına bir təqvim ayında gələn malların dəyəri 300 dollardan çox deyilsə, rüsum tutulmur, bu həddə çatdırılma haqqı da daxildir. Operativ İnformasiya Mərkəzinin yanvar 2026 izahındakı nümunədə 280 dollarlıq paltoya 25 dollar çatdırılma əlavə olunanda cəm 305 dollar olur, rüsum və ƏDV yalnız həddi aşan 5 dollara hesablanır.

Dropshipping satıcısı üçün bunun mənası odur ki, səhifədəki qiymət alıcının son xərci olmaya bilər, xüsusən o, həmin ay başqa sifariş də veribsə. Telefon satanlar üçün əlavə məhdudiyyət var: 2026-dan bir nəfər ildə yalnız bir mobil cihazı güzəştli şərtlə gətirə bilər (Modern.az, fevral 2026).

Satıcı hansı vergini seçə bilər?

Vergi Xidmətinin 2026-cı il sadələşdirilmiş vergi bukleti bu rejimi ƏDV qeydiyyatında olmayan və ardıcıl 12 aylıq dövrün istənilən ayında vergi tutulan əməliyyatlarının həcmi 200,000 manat və ondan az olan şəxslərə açır. Həcm müəyyən edilərkən pərakəndə ticarət və vergi orqanında uçotda olmayan şəxslərə göstərilən xidmətlər üzrə nağdsız qaydada POS-terminal vasitəsilə aparılan ödəmələrdən formalaşan dövriyyə 0.5 əmsalla nəzərə alınır. Xüsusi dərəcəsi olmayan fəaliyyətlərdə vergi ümumi hasilatın 2%-idir.

Onlayn mağazanın kartla aldığı pulun bu əmsala düşüb-düşməməsi ödənişin necə qəbul edildiyindən asılıdır, çünki buklet POS-terminaldan danışır, internet ödəniş şlüzünü ayrıca adlandırmır. Xarici marketpleysdən gələn gəlirin bəyanı da ayrıca sualdır. Hər iki sual vergi məsləhətçisinin işidir.

Pul harada itir?

Əsas itki reklamdadır. İlk həftələrdə bir satışın reklam xərci tez-tez marjanı keçir və bunu yalnız test göstərir. Qalan itkilər də tanışdır.

• Çindən bağlama həftələrlə gələ bilər, yerli mağazalardan bir neçə günə mal almağa öyrəşən alıcılar isə gözləmir. Mənfi rəylər və geri ödəniş tələbləri buradan başlayır.
• Tədarükçüdə mal bitir, pul isə artıq alınıb. Ehtiyat tədarükçü olmayanda sifarişi ləğv etmək qalır.
• Amazon-da başqa satıcının adı yazılmış bir bağlama hesabı riskə salır.

Shopify adı investisiya vədlərində də işlənir. 2025-ci ilin fevralında DİN-in Kibercinayətkarlıqla Mübarizə Baş İdarəsi «First Zenit Capital» adlı şirkətin təsisçisini və daha bir nəfəri saxladı. Şirkət sosial şəbəkələrdə yüksək faiz vəd edir, pulu Shopify üzərindən dövriyyəyə buraxacağını deyirdi. AZƏRTAC-ın yaydığı polis məlumatında real investisiya işinin olmadığı, şirkətin onlayn piramida kimi işlədiyi və zərərçəkənlərdən 500 min manata yaxın pul topladığı göstərilir. Shopify-ın bu işlə əlaqəsi yoxdur, xəbər istintaq mərhələsində yayılıb.

Hazır mağaza satan xidmətlərdə gəlirin mənbəyi mağazanı alan adamın ödənişidir. Real satış hesabatı göstərilməyibsə, gündə 500 dollar qazanc vədi yoxlanmamış qalır.

Kiçik kapitalla başqa sahələrin xərci və geri qayıtma müddəti xırda biznes sahələrinin rəqəmlərlə müqayisəsində toplanıb.

Birinci sınaq necə qurulur?

1. Azərbaycan və ya xarici bazarı seçin, ikisini birdən etməyin.
2. Süzgəcdən keçən 3 məhsulun hər birini özünüzə sifariş edin.
3. Fərdi sahibkar kimi qeydiyyatdan keçin, bank və ya provayderlə ödəniş qəbulunu qoşun.
4. Bir məhsul üçün sadə səhifə hazırlayın: real foto, çatdırılma müddəti, qaytarma şərti, xaricdən gələn malda isə gömrük qeydi.
5. Reklam testinə 100–400 $ ayırın və bir satışın reklam xərcini marja ilə tutuşdurun. Reklam xərci böyükdürsə, növbəti məhsula keçin.

Azərbaycandan onlayn satış haqqında növbəti bələdçiləri e-poçtla almaq üçün abunə olun.