“Şahdəniz”ə doqquz ayda 3 milyard 80 milyon dollar xərclənib

“Şahdəniz” qaz-kondensat yatağı üzrə bu ilin üç rübündə ümumi xərclər 3 milyard 80 milyon dollar olub. Bu barədə BP-nin Azərbaycanda fəaliyyəti üzrə 2026-cı ilin 9 ayının nəticələrinə dair hesabatında deyilir.

Hesabata görə, həmin dövrdə əməliyyat xərcləri təxminən 2 milyard 2 milyon dollar, əsaslı xərclər isə təxminən 1 milyard 78 milyon dollar olub.

İlin ilk doqquz ayında “Şahdəniz Alfa” və “Şahdəniz Bravo” platformalarından birlikdə təqribən 20 milyard standart kubmetr qaz və təxminən 3 milyon ton (təqribən 21 milyon barel) kondensat hasil edilib. Yatağın hazırkı hasilat gücü gündə təxminən 79 milyon, ildə təqribən 28.8 milyard standart kubmetrdir.

Üçüncü rübdə “Şahdəniz 2” layihəsi çərçivəsində şərq-şimal cinah quyularında sualtı işlər davam edib, sentyabrda bu cinahda dördüncü quyu işə salınıb. “Xankəndi” gəmisinin əsas iş həcmi “Şahdəniz 2” olub, eyni zamanda gəmi AÇG-nin “Dərinsulu Günəşli” ərazisində təzyiqin idarə olunması və hasilat səviyyəsinin gücləndirilməsi imkanlarının erkən aşkarlanmasına kömək edən sualtı müdaxilə əməliyyatlarına cəlb olunub. “Tofiq İsmayılov” dalğıc gəmisi “Şahdəniz 2” və AÇG-nin istismarda olan sualtı hasilat obyektlərinə texniki xidmət, yoxlama və müdaxilə işlərinə dəstək verib.

Rübdə “Şahdəniz Alfa” platformasında SDA12 quyusunun qazma işləri başa çatdırılıb. “İstiqlal” qazma qurğusu şərq-şimal cinahında SDH04 quyusunda tamamlama işlərini bitirib, hazırda SDH05 quyusunda həmin işləri aparır. “Heydər Əliyev” qazma qurğusu profilaktik işləri tamamlayaraq qərb cinahında SDD06 quyusunun qazmasına başlayıb.

Ümumilikdə “Şahdəniz 2” çərçivəsində 24 quyu qazılıb: yatağın şimal cinahında beş, qərb cinahında beş, şərq-cənub cinahında dörd, qərb-cənub cinahında beş və şərq-şimal cinahında beş quyu.