Kiberagentlik: fərdi məlumat sızmalarının sayı artıb

Son vaxtlar dövlət və özəl qurumların informasiya sistemlərində təhlükəsizlik insidentləri çoxalıb, nəticədə böyük həcmdə fərdi məlumat sızır. Bu barədə Rəqəmsal İnkişaf və Nəqliyyat Nazirliyinin tabeliyindəki Milli Kibertəhlükəsizlik Agentliyi (MKA) məlumat yayıb.

Agentliyin araşdırmasına görə, sızmaların arxasında bir neçə səbəb dayanır. Sistemlərdə mühafizə tədbirləri lazımi səviyyədə tətbiq olunmur, proqram təminatı vaxtında yenilənmir, giriş və məlumatlara çıxış səlahiyyətləri düzgün idarə edilmir.

Riski artıran amillər üçüncü tərəf xidmət təminatçıları ilə işdə də görünür: təhlükəsizlik öhdəlikləri dəqiq müəyyən edilmir, onların icrasına nəzarət zəif olur, potensial risklər vaxtında aşkarlanıb aradan qaldırılmır.

MKA fərdi məlumatların mülkiyyətçilərini və operatorlarını təşkilati və texniki mühafizə tədbirlərinin effektivliyini qiymətləndirməyə, aşkar edilən risklərə uyğun olaraq təhlükəsizlik mexanizmlərini gücləndirməyə çağırıb.

Agentlik xatırladıb ki, fərdi məlumatların toplanması və işlənilməsi onların mühafizəsi öhdəliyini yaradır. Bu iş üçüncü tərəflərə həvalə olunsa da, qanunvericiliklə müəyyən edilmiş məsuliyyət qüvvədə qalır. Öhdəliklər pozulduqda qanunvericilikdə nəzərdə tutulan hallarda inzibati məsuliyyət yarana bilər.

MKA fərdi məlumatların mühafizəsi ilə bağlı qanunvericiliyin tələblərinə əməl olunmasına nəzarəti davam etdirdiyini və aşkar edilən uyğunsuzluqların aradan qaldırılması üçün zəruri tədbirlər gördüyünü bildirib.