Brayza: ABŞ investorları Azərbaycanda süni intellekt infrastrukturuna marağı artırır

ABŞ-nin texnologiya şirkətləri Azərbaycanda məlumat mərkəzlərinin və süni intellektlə bağlı digər infrastrukturun yaradılmasına investisiya imkanlarını araşdırmağa artan maraq göstərir. Bu barədə Ceymstaun Fondunun İdarə Heyətinin üzvü, ABŞ-nin Azərbaycandakı sabiq səfiri Metyu Brayza AZƏRTAC-a açıqlamasında deyib. Onun sözlərinə görə, bu tendensiya yaxınlarda keçirilmiş Azərbaycan İnvestisiya Forumunda da özünü göstərib.

Brayza həm Azərbaycan hökuməti, həm də ABŞ-nin “Abbott Capital” özəl investisiya şirkətinin tərəfdaşı kimi əməkdaşlıq etdiyi şirkətlərin nümayəndələri, potensial işçilər, müəssisələr və investorlarla şəxsi təmaslarında bu marağın şahidi olduğunu bildirib.

Ekspert Azərbaycanın məlumat mərkəzlərinin və süni intellekt infrastrukturunun yerləşdirilməsi üçün əlverişli coğrafi mövqeyə malik olduğunu deyib. Onun fikrincə, ölkə böyük və sürətlə inkişaf edən bazar olan Mərkəzi Asiyaya yaxındır: infrastruktur bazara nə qədər yaxın yerləşərsə, məlumat ötürülməsində gecikmə bir o qədər az olar və bağlantıların məhsuldarlığı yüksələr. Brayza Azərbaycanı Mərkəzi Asiyadan daxil olan məlumatların emalı və onların Avropa bazarlarına ötürülməsi üçün də əlverişli məkan adlandırıb.

Onun sözlərinə görə, investorlar və Azərbaycan hakimiyyəti bu cür investisiyaların iqtisadi baxımdan səmərəli olub-olmayacağını müəyyənləşdirmək üçün hələ bir neçə müzakirə aparmalıdır. Bununla belə, xüsusilə Ələt Azad İqtisadi Zonasının imkanlarını nəzərə alsaq, bu sahəni perspektivli sayır.

Məlumat mərkəzlərindən başqa, investorlar üçün cəlbedici qeyri-neft sektorları sırasında dağ-mədən sənayesi də yer tutur. Brayza bir neçə onillikdir Azərbaycanda fəaliyyət göstərən “Anglo Asian Mining PLC” şirkətinin ölkədə mis hasilatı sahəsində perspektivli görünən layihələri olduğunu qeyd edib. Onun sözlərinə görə, şirkət Ermənistanda da oxşar investisiya imkanlarını nəzərdən keçirir. Ekspert emal sənayesi və sənaye istehsalı sahələrində də geniş imkanların olduğunu, bu istiqamətdə Ələt Azad İqtisadi Zonasının mühüm rol oynaya biləcəyini deyib.

Brayza “Abbott Capital Management” şirkətinin ABŞ-dən olan potensial investorlarla digər şirkətlərin Ələt Azad İqtisadi Zonası ilə əlaqələrinin qurulmasına kömək etməkdə maraqlı olduğunu bildirib. Onun fikrincə, ABŞ-nin vençur kapitalı və özəl kapital fondları Azərbaycan startapları ilə əməkdaşlığı gücləndirə bilər, bu prosesdə “Abbott Capital” kimi şirkətlər vasitəçi rolunu oynaya bilər.

Ekspert Azərbaycanı geniş coğrafiyada strateji və investisiya maraqlarına malik inkişaf edən regional aktor kimi gördüklərini deyib. Söhbət Xəzər dənizi vasitəsilə Azərbaycandan Mərkəzi Asiyaya, Ermənistan və Gürcüstan üzərindən Türkiyə və Avropaya, cənub istiqamətində isə Yaxın Şərq regionuna uzanan coğrafiyadan gedir. Brayza Azərbaycan İnvestisiya Forumu kimi tədbirlərin investorlarla Azərbaycandakı tərəfdaşlar arasında əlaqələrin qurulmasında mühüm əhəmiyyət daşıdığını əlavə edib.

O, Orta Dəhlizin və ABŞ-dən, digər ölkələrdən əldə olunan rəqəmsal texnologiyaların logistika axınlarını müşayiət edən sənədləşmə proseslərinin səmərəliliyini artırmaq üçün imkanlar yaratdığını deyib. Bu həllərə elektron və ya rəqəmsal konosamentlər, həmçinin Azərbaycan ərazisinə və ölkə vasitəsilə daşınan mal və xidmətlərin maneəsiz hərəkətini təmin edə biləcək digər sənədlər daxildir.